Төрийн байгуулалтын байнгын хорооны /2025.11.28/-ийн хуралдаанаар Улсын Их Хурлын Тамгын газрын Ерөнхий нарийн бичгийн даргаар Л.Өлзийсайханыг томилох саналыг гишүүдийн олонх буюу 70.6 хувийн саналаар дэмжсэн. Улмаар УИХ-аар хэлэлцэхэд гишүүдийн 64,2 хувийн саналаар түүнийг Үндсэн хуулийн цэцийн гишүүний үүрэгт ажлаас нь чөлөөлсөн юм.

Түүний дараа УИХ-ын Ерөнхий нарийн бичгийн даргад томилох эсэхийг хэлэлцэхээр болоход АН-ын бүлгийн зүгээс буюу дэд дарга Х.Тэмүүжин хэлэлцэх асуудлыг гурван хоногоор түр хойшлуулах саналыг дэвшүүлсэн. Учир нь АН-ын бүлгийн зарим гишүүн гадаад томилолттой явж байгаа учир ирэх даваа гарагт АН-ын бүлгийн хуралдаанд бүрэн бүрэлдэхүүнээрээ хэлэлцэж байж санал өгнө гэв. Харин УИХ-ын дарга Н.Учрал "УИХ-ын ерөнхий нарийн бичгийн албан тушаалын томилгоонд улс төрийн шийдвэр гаргаж болохгүй. УИХ-ын ерөнхий нарийн бичиг, тэргүүн дэд байхгүй ажил цалгардаад байна. Томилгоог яаралтай хийх шаардлагатай" хэмээсэн юм. 

Тэрбээр өмнө нь 2019-2023 онд УИХ-ын Ерөнхий нарийн бичгийн дарга хийж байсан буюу тус албанд дахин томилогдлоо

Улсын Их Хурал дахь АН-ын бүлгээс авсан завсарлагын хугацаа дууссан тул Улсын Их Хурлын Ерөнхий нарийн бичгийн даргыг томилох, чөлөөлөх тухай асуудлыг үргэлжлүүлэн хэлэлцэв. Улмаар Лувсандоржийн Өлзийсайханыг  Улсын Их Хурлын Ерөнхий нарийн бичгийн даргаар томилохыг хуралдаанд оролцсон гишүүдийн 61.3 хувь нь дэмжжээ.

УИХ-ын өмнөх Ерөнхий нарийн бичгийн дарга Ц.Баасандоржийг Улсын Их Хурлын Тамгын газрын Ерөнхий нарийн бичгийн даргаас өөрийн хүсэлтээр чөлөөлөгдөх хүсэлтээ өгсөн хэмээн УИХ-ын дарга Н.Учрал мэдэгдсэн. Тэрбээр өчигдөр Ц.Баасандоржоос тамгаа хүлээн авлаа.

Монгол Улсын Гавьяат хуульч ЛУВСАНДОРЖИЙН ӨЛЗИЙСАЙХАН

Боловсрол:

• 1993 онд Нийслэлийн 50 дугаар дунд сургууль;
• 1998 онд Монгол Улсын Их Сургуулийн Хууль зүйн сургуульд хууль зүйн бакалавр;
• 1999 онд Монгол Улсын Их Сургуулийн Хууль зүйн сургуульд хууль зүйн магистр;
• Эрх зүйч мэргэжилтэй, хууль зүйн ухааны доктор (Ph. D), дэд профессор.

Ажилласан байдал:

• 1998-2002 онд Улсын Багшийн Их Сургуульд багш;
• 2002-2016 онд Монгол Улсын Их Сургуулийн Хууль зүйн сургуульд багш, ахлах багш;
• 2007-2012 онд Улсын Их Хурлын Тамгын газарт зөвлөх, Экспертийн хэсгийг хариуцсан ахлах зөвлөх;
• 2012 онд Монгол Улсын Их Хурлын даргын Хууль зүйн бодлогын зөвлөх;
• 2013-2015 онд Шүүхийн ерөнхий зөвлөлийн Шүүхийн хүний нөөцийн газрын дарга;
• 2015-2017 онд Нийслэл дэх Захиргааны хэргийн анхан шатны шүүхийн шүүгч;
• 2017-2018 онд Улсын Их Хурлын Тамгын газарт Төрийн байгуулалтын байнгын хорооны ажлын албаны ахлах зөвлөх;
• 2018-2019 онд Засгийн газрын Хэрэг эрхлэх газрын Стратегийн удирдлага, зохицуулалтын газрын дарга;
• 2019 онд Монгол Улсын Их Хурлын даргын ахлах зөвлөх бөгөөд ажлын албаны дарга;
• 2019-2023 онд Монгол Улсын Их Хурлын Ерөнхий нарийн бичгийн дарга.

Монгол Улсын Их Хурлын санал болгосноор Монгол Улсын Их Хурлын 2023 оны 11 дүгээр сарын 16-ны өдрийн 96 дугаар тогтоолоор Монгол Улсын Үндсэн хуулийн цэцийн гишүүнээр томилогдон ажилласан.